බුද්ධශාසන හා අධිකරණ අමාත්‍යය විජයදාස රාජපක්ෂ මහතාට එරෙහිව විශ්වාසභංගයක් ගෙන ඒමේ කිසිදු අදහසක් එජාපය තුළ නොමැති බව සභානායක, උසස් අධ්‍යාපන හා මහා මාර්ග ඇමැති ලක්ෂ්මන් කිරිඇල්ල මහතා පවසයි.
මේ ගැටලුව සම්බන්ධව මේ මස 17 දින පැවැත්වෙන එජාප කෘත්‍යාධිකාරී මණ්ඩල රැස්වීමේදී සාකච්ඡා කිරීමට නියමිත බවද ඒ මහතා කීය. අග්‍රාමාත්‍යය රනිල් වික්‍රමසිංහ මහතාගේ දේශපාලන දිවියට වසර 40 ක් සපිරීම නිමිත්තෙන් මහනුවර දළදා මාලිගාවේදී පෙරේදා (13) පැවැති දානය පුණ්‍යකර්මයෙන් අනතුරුව මාධ්‍යය හමුවේ අදහස් දක්වමින් ඇමැතිවරයා මේ බව ප්‍රකාශ කළේය.
අධිකරණයේ විභාග වන නඩුවක් සම්බන්ධයෙන් මැදිහත් වීමට පාර්ලිමේන්තු මන්ත්‍රීවරුන්ට හෝ සාමාන්‍යය ජනතාවට නොහැකි බව පිළිගන්නා නමුත් අධිකරණ පරිපාලනය සම්බන්ධව පවතින අඩුපාඩු පිළිබඳව අදහස් දැක්වීමේ අයිතිය ඕනෑම අයෙකුට තිබෙන බවද විශේෂයෙන් නඩු ප්‍රමාදය පිළිබඳ කතා කළ යුතුව තිබෙන බවද ඇමැති කිරිඇල්ල මහතා කීය.
පොලීසිය මගින් පරීක්ෂණ අවසන් කළ පසුගිය රජයේ සිදුවූ වංචා දූෂණ සම්බන්ධ ලිපිගොනු 80 ක් නීතිපති දෙපාර්තුමේන්තුවට බාරදී වසරකට වැඩි කාලයක් ගතව ඇති බවත් මේ තුළ එම නඩු විභාග ප්‍රමාද කිරීමේ සැලැසුම් සහගත වැඩපිළිවෙළක් තිබෙන බව පෙනෙන්නට තිබෙන බවත් හෙතෙම ප්‍රකාශ කළේය.
මෙරට ජනතාව අධිකරණ බලය පාර්ලිමේන්තුව හරහා අධිකරණ වලට හා නීතිපති දෙපාර්තුමේන්තුවට ලබාදී තිබෙන බවත් එසේ බලය ලබාදුන් ජනතාව අද නඩු ප්‍රමාදයට හේතු මහජන නියෝජිතයින් ගෙන් විමසන බවත් ඇමැතිවරයා පැවසුවේය.
