මත්ද්‍රව්‍ය ළඟ තබා ගැනීම යටතේ අත්අඩංගුවට පත් වු මුදල් අමාත්‍යවරයාගේ මහජන සම්බන්ධතා නිලධාරී එල්ල වන චෝදනා හමුවේ සිය ධුරයෙන් ඉල්ලා අස්වීමෙන් හිටපු මුදල් ඇමති වත්මන් විදේශ ඇමති රවි කරුණානායක හට අගනා ආදර්ශයක් සපයා තිබේ.
පොලිස් විශේෂ කාර්ය බලකාය විසින් 05 සෙනසුරාදා රාත්‍රියේ මංගල සමරවීර ඇමතිවරයාගේ ලේකම් සමීර මනහර ඇතුළු හතර දෙනකු ගමන් ගත් මෝටර් රථයේ මත්ද්‍රව්‍ය ඇති බවට චෝදනා කරමින් අත්අඩංගුවට ගෙත තිබුණි.
අත්අඩංගුවට ගත් පිරිස ගල්කිස්ස වැඩබලන මහේස්ත්‍රත් වෙත ඉදිරිපත් කර ඇති අතර එහිදි මත්ද්‍රව්‍ය ළඟ තිබු පුද්ගලයා හැර සෙසු සැකකරුවන් ඊට සම්බන්ධ නැති බව අනාවරණය වීමත් සමඟ ඔවුන් ඇප මත මුදා හැර ඇත.
මෙම සිද්ධිය මුල් කර ගනිමින් යම් කුමන්ත්‍රණකාරි පිරිසක් විසින් මංගල සමරවීර ඇමතිවරයාට සහ යහපාලන රජයට කැළලක් ඇති කිරීමට උත්සාහ දරන බව පවසමින් සමීර මනහර සිය ධුරයෙන් ඉල්ලා අස්වී තිබේ.
අස්වෙන ලෙස බලපෑමක් නැහැ
මේ අතර මහ බැංකු බැඳුම්කර සිද්ධියට චෝදනා එල්ල වීමත් සමඟ අමාත්‍ය රවී කරුණානායක හට සිය ධුරයෙන් ඉල්ලා අස්වන ලෙසට ජනපති හා අගමැති ඇතුළු විවිධ පාර්ශව ඉල්ලිම් කළ බව මාධ්‍ය වාර්තා කර තිබුණත් හිටපු මුදල් ඇමැති තවමත් රැඳී සිටී.
රවී කරුණානායක පාර්ලිමේන්තුවේ විශ්වාසය කඩ කළ බව පවසමින් ඒකාබද්ධ විපක්ෂය විශ්වාස භංග යෝජනාවක් ඉදිරිපත් කර ඇති අතර ශ්‍රීලනිපය සහ එජාපයේ ඇතැම් පිරිස් එයට සහය පල කරනු ඇති බවට ඒකාබද්ධ විපක්ෂය විශ්වාසය පල කර සිටී.
කෙසේ වෙතත් ජනාධිපතිවරයා හෝ අගමැතිවරයා තමන්ට ඉල්ලා අස්වන ලෙසට බලපෑම් නොකළ බව විදේශ අමාත්‍ය රවී කරුණානායක සිය ෆේස් බුක් පිටුවේ පල කර තිබේ.
