අනීකා විජේසූරිය මහත්මියට තර්ජනය කළ බව කියන ශනිල් නෙත්තිකුමාර නමැති පුද්ගලයා පාර්ලිමේන්තු මන්ත්‍රී රවි කරුණානායක මහතාගේ ඥාතියෙකු නොවන අතර, එසේ ඥාතියෙකු බව අතිරේක සොලිසිටර් ජනරාල් යසන්ත කෝදාගොඩ මහතා ඔප්පුකළහොත් තමා පාර්ලිමේන්තු මන්ත්‍රී ධුරයෙන් ඉල්ලා අස්වන බව පාර්ලිමේන්තු මන්ත්‍රී රවි කරුණානායක මහතා ඊයේ (07දා) පාර්ලිමේන්තුවේදී ප්‍රකාශ කළේය.
එසේ ඔප්පුකිරීමට නොහැකි වුවහොත් අතිරේක සොලිසිටර් ජනරාල් යසන්ත කෝදාගොඩ මහතා බැඳුම්කර කොමිසමෙන් සමාව ගතයුතු බවද රවි කරුණානායක මහතා ප්‍රකාශ කර සිටියේ වරප්‍රසාද කඩවීමේ ප්‍රශ්නයක් පාර්ලිමේන්තුවට ඉදිරිපත් කරමිනි.
වැඩිදුරටත් අදහස් දැක්වූ මන්ත්‍රීවරයා,
“2017.10.07 දින රජයේ අතිරේක සොලිසිටර් ජෙනරාල් යසන්ත කෝදාගොඩ මහතා විසින් මහ බැංකු බැඳුම්කර කොමිසම අවසාන වීමට නියමිතව තිබූ දිනයේ කරන ලද ප්‍රකාශයක් නිසා මගේ වරප්‍රසාද කඩවී තිබෙනවා.
අනීකා විජේසූරියගේ වැඩිමහල් සොහොයුරු විජිත විජේසූරිය නමැත්තා යොමුකළ පැමිණිල්ලක පිටපතට අනුව ඇයට මරණ තර්ජන එල්ලවී ඇති බව ඔහු පැවසුවා. ඒ හේතුවෙන් රටින් පලායාමට සිදුව ඇති බව පැවසුවා.
එම ප්‍රකාශයේ සඳහන්ව තිබෙන ශනිල් නෙත්තිකුමාර නමැත්තා සමග මගේ කිසිදු සම්බන්ධතාවක් නැහැ. ඒබව ඔප්පු කළොත් මම අස්වීමට සූදානම්. එය ඔප්පු කළ නොහැකි වුවහොත් ඔහු විසින් හිතාමතා නොමඟ යවන ලද බැඳුම්කර කොමිසමෙන් සමාවගත යුතුයි" යනුවෙන් කියා සිටියේය.
අද
